Ba Ó Timór (Puisi)

Maske kartus borus hau ruin

Hau hakat firmi ba oin
Maske Granada fera hau fuan
Hau halai iha liña oin
Maibé hau ta’uk
Ho Dollar ema bele sosa imi nia klamar hosi kotuk

Hau rai, hau ran fakar fatin
Hau foho, hau sadere fatin
Hau mota, hau kosar suli fatin
Ai-laran, funu-nain nia ain-fatin
Hau ta’uk imi halo edifisiu luxu
Sai fali, na’ok osan nia fatin

Heroi no funu nain Timor nian
Imi mak uluk asuwain
La’os ema bai-bain
Hasoru inimigu dala wain
Hau husu imi harohan nafatin
Atu Liberdade ne’e iha folin wain

Wainhira loron sei nabilan nafatin
Lafaek oan sira tuba rai metin
Sei unidade nafatin
Na'ok ten sei laiha fatin
O nia Bandeira sei hamriik metin
O nia naran sei morin nafatin
Tamba ami sei hadomi O nafatin